Lýsing

Anja Hartmann Wardum

Vælkomin á mína síðu

eri 52 ár fødd og uppvaksin í Havn. Foreldur míni eru Rannvá og Suni Wardum, og eg havi eina yngri systir, Beinta Wardum. Eri gift við Óla Svein Lutherusson, og vit hava 3 børn – Suni 18 ár, Ravnhild 14 ár og Arnóra 13 ár.  Míni barnaár gekk eg í skúla hjá nonnunum í Sankta Frans skúla og síðani í framhaldsdeildini hjá Tórshavnar Kommunuskúla. Eri útbúgvin skrivstovufólk hjá Tórshavnar Býráð í 1989. Liðug við Hægri Handilsskúla í 1991 fór eg eitt stutt skifti til Onglands at arbeiða sum gongsgenta á einum sjúkrahúsi. Kom heim aftur í 1992 og var við til at opna Rúsdrekkasølu Landsins. Flutti til Danmarkar í lestrarørindum í 1995, har eg bleiv útbúgvin sum innkeyps- og importsakademiøkonom. Eftir hetta starvaðist eg sum innkeypari hjá einum víninnflytara í Keypmannahavn í nøkur ár. Afturkomin til Føroyar arbeiddi eg sum innkeypari/marknaðarsamskipari á Føroya Tele, og síðani sum pensjónsráðgevi hjá Betri Pensjón. Í 2010 flutti eg saman við familjuni aftur til Danmarkar í lestrarørindum hjá manninum. Hesi 3 árini var eg fyri tað mesta heimagangandi við onkrum fyrfallandi arbeiði, til vit fluttu heima aftur í 2013. Eftir hetta var eg eitt skifti á Snarskivuni hjá Tórshavnar kommunu við barnaansingarskipanini. Tá vit fluttu til Nólsoyar Í 2019, starvaðist eg hjá Safari Transport, og í 2020 fekk eg møguleikan at reka Kunningarstovuna í Nólsoy sum Kunningarleiðari hjá Visit Nólsoy.

 

Hví stilli eg upp?

Eg brenni fyri at gera mun og fáa úrslit í felagsskapum saman við fólki og at skapa trivnað fyri fólk, har øll skulu hava somu rættindi og møguleikar – ikki minst hjá teimum, ið hava trupult at verða hoyrd. Vit kunnu megna so nógv saman í kommununi og í okkara einastandandi landi. Tí havi eg játtað at bjóða meg fram til kommunuvalið.

Eg vil verða ein rødd sum hoyrist, hjá bæði havnafólki, nólsoyingum og fólki á smáplássunum. Tó sum havnardama, við stórum H og samfelagsborgari, vil eg samstundis arbeiða við hjartamálum, ið hava týdning fyri øll fólk og øll pláss í okkara samansettu kommunu.

 

Hesi eru fremstu hjartamálini, sum eg vil arbeiða fyri:

 

  • At loysa bústaðartrotið sum skjótast bæði í Havn og í Nósloy hjá ungum og eldri, soleiðis at tað ikki er pengapungurin, ið ger av, hvør hevur rætt til eitt gott og trygt heim. Kommunan skal gera sítt til, at borgarar kunnu fáa ein bústað fyri ein rímiligan penga.

 

  • At Nólsoy skal gerast tann grøna oyggin við burðardyggari orku, matframleiðslu, náttúruvernd og skipaðari ferðavinnu, ið gevur inntøkur men samstundis virðir og verjir náttúruna, mentanina og sereyðkennini í Nólsoy.

 

  • At fáa munandi betri ferðasamband til Nólsoyar. Ikki minst fyri børn og ung hevur tað stóran týdning fyri at kunna taka lut í frítíðarvirksemi og tilboðum í kommununi og at kunna vera saman við vinfólki, tá ið tey fara í skúla í Havn. Hetta er eisini umráðandi fyri børnini, sum eru á stovni í Nólsoy, meðan foreldrini eru til arbeiðis í Havn. Fleiri túrar og eitt borgarakort til allar borgarar í kommununi til at ferðast frítt eisini til Nólsoyar og út í Hest, sama sum við býarbussunum. Samferðsluviðurskiftini í allari kommununi skula endruskoðast, t.v.s. eisini til Kaldbak, út í Heyst, til Kirkjubø, Velbastaðar, Hvítanesar o.a.

 

  • At tryggja atkomuviðurskifti hjá fólki við serligum tørvi og koyristólsbrúkarum allastaðni í kommuni. Parkerings- og ferðsluviðurskiftini í Havn í heila tikið og tryggja øllum nólsoyingum, ið hava tørv á at hava bil standandi í Havn, parkering á Bursatanga. At fáa ta stóru og tungu ferðsluna út um miðbýin.

 

  • Ítrótturin í kommununi skal raðfestast høgt. Hetta er grundarsteinurin fyri heilsuna hjá okkum øllum. Allir borgarar skula hava somu møguleikar at íðka ítrótt og annað ítriv, og tí skal kommunan útvega frítíðarkort. Umstøðurnar hjá teimum ymsu ítróttarfeløgunum skula dagførast.

 

Hvat kann eg lova tær?

 

Við mínum sunna viti og skili kann eg ikki lova stór lyfti, men eg fari fyrst og fremst at arbeiða við teimum ætlanum, sum eru settar í gongd. Hetta tí eg veit, at tað er nógv, sum enn stendur í hálvum gekki.

 

Eri havnardama við stórum H, og hóast eg eri búsitandi í Nólsoy, so fari eg at gera alt fyri, at Havnin er og verður miðdepil Føroya. Eg fari at arbeiða fyri, at smáplássini sum hoyra til kommununa kenna seg sum ein partur av Havnini og ikki verða gloymd. Jú betur útjaðarin til Havnina hevur tað, jú betur og størri verður Havnin.

 

Eg fari at arbeiða fyri, at alt tað sum Havnin stendur fyri verður varðveitt. Økir og miðbýurin sum eyðkenna Havnina og smáplássini skulu varðveitast, soleiðis sum vit havnarfólk ella lokala fólkið vilja hava tað. Alt tað sum eyðkennir okkum og sum vit kunna eyðmerkja okkum við skal varðveitast.

 

Eg fari at arbeiða fyri Tórshavnar kommunu og fólkinum har býr.

 

Set krossin við meg á lista E, so fært tú eina ektaða rødd – arbeiðskraft fyri teg!

Gott val!

Vinarliga,

Anja Hartmann Wardum

Valevni hjá Suðurstreymoyar Tjóðveldi

 

 

 

 

 

Vælkomin at venda tær til mín á: awardum@gmail.com

Her kanst tú lesa greinir og meira um, hvørjum eg vil arbeiða við: Anja Hartmann Wardum

X